Leerders van Worcester Gimnasium wat belangstel in ’n loopbaan in radiografie het onlangs besoek afgelê by Worcester Radiologie.

Interessante gesprekke oor beskikbare tegnologie, kwalifikasies en werksure is gevoer, maar ’n vraag oor ’n radiografis se ervaring van trauma-gevalle het baie insig gegee in die kruks van die beroep: dat ’n radiografis ’n baie spesifieke rol in die diagnostiese proses vertolk en dat die verantwoordelikheid om dit effektief te doen baie groot is.

“Dit is soms vir ’n mens erg,” het Melanie gesê oor voorvalle waar pasiënte byvoorbeeld ernstig beseer is, “maar jy werk vinnig en effektief, want dit is jou werk en dit is waarvoor jy opgelei is. Onthou, dit is nie ons werk om lewens te red nie, maar om dokters te help sien – so vinnig as moontlik – sodat hulle weet presies wat om te doen om die pasiënte se lewens te red.”

Wat wel ’n groot impak op haar maak, is kinders by wie kanker byvoorbeeld gediagnoseer word, of wat seergekry het. “Maar ons as kollegas, wat almal weet waaroor dit gaan, gesels baie met mekaar en dit help om te ontlaai,” het sy gesê.

Megan, ’n radiografis en “toergids” tydens die besoek, het oor die onderskeie modaliteite soos X-strale, RT- en MR-skanderings gepraat en die werking van die verskillende apparaat verduidelik.

Sy het ook verduidelik waarom iemand wat mammogramme uitvoer ’n addisionele kwalifikasie moet hê (om te verseker die radiografis wat dit uitvoer het genoeg gespesialiseerde kennis om nie tekens van borskanker mis te kyk nie), gedemonstreer hoe sonarbeelding gedoen word en ’n reeks beelde van verskillende dele van die liggaam, en met verskillende masjiene geneem, vertoon vir ’n praktiese oefening.

Alle radiograwe moet by die Raad vir Gesondheidsberoepe van Suid-Afrika (HPCSA) geregistreer wees, wat vereis dat hulle by ’n HPCSA-geakkrediteerde instelling studeer. Vir meer inligting oor radiografie-kwalifikasies wat in Suid-Afrika beskikbaar is, klik hier: